ಅಸಮಾನತೆ ತುಂಬಿದ ಭಾರತದಲ್ಲಿ ಸಮಾನತೆಯನ್ನು ತರುವ ಉದ್ದೇಶದಿಂದ ಡಾ.ಬಿ.ಆರ್.ಅಂಬೇಡ್ಕರ್ ಅವರು ಸರ್ವಸಮಾನತೆಯ ಪ್ರತೀಕವಾದ ಸಂವಿಧಾನವನ್ನು 1949ನೇ ಇಸವಿಯ ನವಂಬರ್ ತಿಂಗಳ 26ನೇ ತಾರೀಖಿನಂದು ಭಾರತ ಸರ್ಕಾರಕ್ಕೆ ಸಮರ್ಪಿಸಿದರು. ನಂತರ ಭಾರತ ಸರ್ಕಾರವು 1950ನೇ ಇಸವಿಯ ಜನವರಿ 26ನೇ ದಿನದಂದ ಸಂವಿಧಾನವನ್ನು ಅಧಿಕೃತವಾಗಿ ಅಳವಡಿಸಿಕೊಂಡು ಆ ದಿನವನ್ನು ಗಣರಾಜ್ಯ ದಿನ ಎಂದು ಸಂಭ್ರಮಿಸುತ್ತ ಬರಲಾಗಿದೆ. ಇಂದಿಗೆ ಭಾರತ ಸಂವಿಧಾನ ಜಾರಿಯಾಗಿ 75 ವರ್ಷ ತುಂಬಿದೆ. ಸಂವಿಧಾನ ಜಾರಿಯಾಗಿ ಈ 75 ವರ್ಷಗಳಲ್ಲಿ ಭಾರತದಲ್ಲಿ ಗಣನೀಯವಾದ ಪ್ರಗತಿಯಾಗಿದೆ. ಆದರೆ ಭಾರತದ ಪ್ರಗತಿಗೆ ಕಾರಣವಾದ ಸಂವಿಧಾನದ ಬಗ್ಗೆ ಇನ್ನೂ ಜನಸಾಮಾನ್ಯರಿಗೆ ಮಾತ್ರವಲ್ಲ ವಿದ್ಯಾವಂತರಿಗೂ ಅರಿವಿನ‌ ಕೊರತೆ ಇದೆ. ಹೀಗಾಗಿ ಸಂವಿಧಾನ ಜಾರಿಯಾಗಿ 75 ಪೂರ್ಣವಾಗಿರುವ ಈ ಹೊತ್ತಿನಲ್ಲಿ‌ ಸರ್ಕಾರಗಳು ಸಂವಿಧಾನ ಜಾಗೃತಿಗಾಗಿ ವಿಶೇಷ ಯೋಜನೆಗಳನ್ನು ರೂಪಿಸಿ ಜನಸಾಮಾನ್ಯ ಸಂವಿಧಾನದ ಬಗ್ಗೆ ಜಾಗೃತಿ ಮೂಡಿಸುವ ವಿಶೇಷ ಯೋಜನೆ ಕೈಗೊಂಡಿವೆ. ಈ ಹೊತ್ತಿನಲ್ಲಿ ನಾವು ಏಕಾಂತಗಿರಿ ಟ್ರಸ್ಟ್ ಅಡಿಯಲ್ಲಿ "ಸಂವಿಧಾನ ಜಾಗೃತಿ ಅಭಿಯಾನ-2024" ರ ಅಡಿಯಲ್ಲಿ ಶಾಲಾ ಮಕ್ಕಳು, ಜನಸಾಮಾನ್ಯರನ್ನು ಗುರಿಯಾಗಿಟ್ಟುಕೊಂಡು ಸಂವಿಧಾನದ ಕುರಿತಾಗಿ ಅರಿವು ಮೂಡಿಸುವ ನಿಟ್ಟಿನಲ್ಲಿ ಸ್ಪರ್ಧೆ, ರಸಪ್ರಶ್ನೆ, ಸಂವಿಧಾನ ಪೀಠಿಕೆಯ ಕಂಠಪಾಠದಂತಹ ಕಾರ್ಯಯೋಜನೆ ಮೂಲಕ ಸಂವಿಧಾನದ ಅರಿವು ಮೂಡಿಸುವ ಪ್ರಯತ್ನಕ್ಕೆ ಮುಂದಾಗಿರುತ್ತೇವೆ. ಇದರ ಭಾಗವಾಗಿ ಸಂವಿಧಾನ ಪೀಠಿಕೆಯನ್ನು ಜನಸಾಮಾನ್ಯರು ಹಾಗೂ ವಿದ್ಯಾರ್ಥಿಗಳ ಕೈಗೆ ಸುಲಭವಾಗಿ ತಲುಪಿಸುವ ಹೊಣೆ ಹೊತ್ತು ಮುನ್ನಡೆಯುತ್ತಿದ್ದೇವೆ.